mga imahen ng pagdarahop

Kinakabagang palabigasan
sa ilalim ng kalang singlamig
ng nguso ng butas na takure.

Mga langutngot ng gasgas
na bitukang namimilipit
sa ibabaw ng dulang.

Mga matang nililingkis ng tagtuyot
habang naglalambitin sa nagninisnis
na atip na gawa sa dahong niyog – 

binibigti ang gutom habang nakikipagpiko
	sa mga usa at baboy-damong dumudungaw
	sa manipis na siwang ng bubong.

Hershey’s at Barbie doll na naliligiran
ng pader na nakatirintas ng alambre,
at pinakikinang ng mga pangil na bubog –

	tinatanuran ng mga matang may lisik
ng tingga, ng amoy pusaling pag-ismid,
ng tapik sa balikat na singgaspang ng punso.

Ulilang tsinelas, gulanit na istrimer,
sinasakal ng tirgas at pulbura
sa sinapupunan ng Mendiola

Ararong nginangatngat ng kalawang,
nakahilig sa tarangkahang inuunano
ng mga mutha, nasasabik sa haplos 

	ng mga kalyuhing daliring ngayo’y naghahasik
ng liyab sa tagulaylay at oyayi ng paghuhunos;
mga daliring sumisipol ng punglo at palakard,

	bigas   tsinelas  kalan  dulang,
	upang muling padaluyin ang ilog
	sa nangangalirang na retina ng tagtuyot. 

makamandag ang tagtuyot

                Makamandag ang tagtuyot.
Sinisipsip nito ang utak
at lakas ng ano mang may buhay 

           na kayang magpakislot ng salita.
Kapag sumagpang, hindi ito bumibitiw
hanggang hindi nalalagutan ng hininga 

ang biktima.  Minsa’y  naka-engkuwentro
                         ko ang tagtuyot, nanlilisik
ang kanyang mata, wala akong nagawa

                                  kundi ipain  ang aking leeg
                na agad niyang  sinagpang;
rumagasa ang kanyang kamandag 

                             sa aking mga ugat, umakyat
sa utak, nagdiliryo ang aking ulirat.
                  Muntik matigang ang aking lakas.

Kulog ang kanyang halakhak
                             nang inakala niyang lubusan
na niya akong nagapi.  Ngunit 

                            sa kahuli-hulihan kong sigok,
bumulwak ang mga salita,
bumangon ang mga imahen, 

                            rumagasa ang hiraya. Naumid
ang tagtuyot, nagkalasug-lasog
makikintab niyang mga pangil.