poso at bituin

Sabi mo
ako’y iyong ginising
sa pagkakagupiling.

Nangako ka
ng isang bituin.

Salamat.

Pero sana
ipagtayo mo rin ako
ng poso;
kailangan ko ng tubig
na pantanggal-muta,

nang aking maaninag
ang ningning
ng iyong pangako.

pangungulila

Kagabi,
                       sa pusod ng dilim,
                              isa akong

         ulilang sagwan,

                 kinukutib
ng mga alon
                     sa gitna ng laot.

                                Nakatingala
sa kulay alkitran
      na langit,

                               nakamasid
sa mga pundidong bituin, 

habang sunung-sunong
ang unti-unting natutunaw 

                                    na buwan.